Miðnætursól er hvað fallegasti hluti sumarsins, hún einkennir hughrif margra af íslensku sumri og ekki skemmir fyrir staðsetning þeirra fjölmörgu fjarða á Norðurlandi. Það er töfrum líkast þegar miðnætursólin lýsir upp himininn í fallegum gulum og rauðum litum. Þegar vindinn lægir og birtan verður engri lík – þú týmir ekki að sofa og langar mest af öllu að vera úti alla nóttina. Hvergi er betra að upplifa miðnætursólina en á Norðurlandi og hér gefst tækifæri til að standa meðal annars á Heimskautsbaugnum þegar sólin er hvað hæst á lofti. Fjölmargir aðrir áningastaðir eru um allt Norðurland og hvetjum við ykkur til að staldra við og njóta kyrrðarinnar á þessum einstaka árstíma.
Fjörur á Norðurlandi eru margar og þar leynist oft hinn ýmsi fjársjóður. Staldrið við og hlustið á öldurnar og njótið þess að horfa á hvernig geislar sólarinnar speglast í hafinu.
Sum fyrirtæki bjóða einnig uppá kvöldferðir og verður upplifunin einhvernvegin öðruvísi þegar hún er stunduð undir fallegum litum miðnætursólarinnar, t.d. jet ski, kayak, hvalaskoðun, bátaferðir, yoga, róðrabretti og hestaferðir.
View images