Skipting gistinátta eftir árstíma

ATH. Þegar myndritin hér að neðan eru skoðuð er mælt með því að opna þau á heilum skjá. Það er gert með því að smella á hnappinn efst í hægra horni hverrar myndar og velja "allur skjárinn".

Umfang ferðaþjónustu á Norðurlandi sveiflast verulega eftir árstímum. Árstíðasveiflan sést glögglega ef dreifing gistinátta er skoðuð eftir mánuðum. Hlutfall gistinátta yfir sumarmánuðina (maí til og með ágúst) á árinu 2024 var um 68% gistinátta ársins, en 32% gistinátta dreifast yfir aðra mánuði ársins. Ef skoðuð er dreifing gistinátta erlendra gesta eftir árstímum, er hlutfallið 66% vs. 34%. Gistinætur Íslendinga yfir sumarmánuðina eru 73% af gistináttum þeirra yfir árið, en 27% gistinátta eiga sér stað á vetrartíma. Árstíðarsveifla gistinátta Íslendinga er því nokkru meiri en árstíðasveifla gistinátta erlendra gesta.

Ef skoðuð er dreifing gistinátta eftir þjóðerni gesta kemur í ljós að árstíðarsveiflan er nokkuð mismunandi eftir því hvaða þjóðerni er skoðað. Myndin hér að neðan sýnir dreifingu gistinátta gesta frá þeim 12 löndum sem standa baki flestum gistinóttum á Norðurlandi árið um kring.

Árstíðasveiflan er minnst ef litið er til gistinátta gesta frá Bretlandi, en 48% gistinátta Breta voru yfir vetrartíma, en 52% yfir sumartíma. Yfir þriðjungur gistinátta gesta frá Bandaríkjunum, Sviss, Spáni, og Austurríki eiga sér einnig stað yfir vetrartímann. Gestir frá Kína er eini hópurinn sem skoðaður var sem ver fleiri gistináttum á Norðurlandi yfir vetrartíma (56%) en sumartíma (44%).

Árstíðasveiflan er hins vegar mest ef skoðaðar eru gistinætur Pólverja, en aðeins 24% þeirra falla á vetrartíma, en 76% á sumartíma. Hjá Frökkum er hlutfallið svipað, eða 25% yfir vetrartíma og 75% yfir sumartíma.

Árstíðasveifla ferðaþjónustu er veruleg í öllum sveitarfélögum Norðurlands. Myndin hér að neðan sýnir fjölda gistinátta á öllum tegundum gististaða eftir sveitarfélögum á árinu 2024, sem og skiptingu í hverju sveitarfélagi milli gistinátta yfir sumartíma (maí til og með ágúst) og vetrartíma (restin af árinu). Akureyri og aðliggjandi sveitarfélög skera sig nokkuð úr, en þar eiga gistinætur yfir vetrartíma stærri hlut í heildarfjölda gistinátta.