Áfangastaðaáætlun Norðurlands er unnin af Markaðsstofu Norðurlands (MN) í samstarfi við Ferðamálastofu og breiðan hóp hagaðila ferðaþjónustunnar á Norðurlandi. Áætlunin tekur til alls starfssvæðis MN eða frá Hrútafirði yfir á Bakkafjörð. Í áfangastaðaáætlun (e. Destination Management Plan – DMP) felst heildstætt ferli þar sem litið er til skipulags og samhæfingar í þróun og stýringu allra þeirra þátta sem geta haft áhrif á upplifun ferðamanna á viðkomandi svæði/áfangastað, þ.m.t. þarfir gesta, heimamanna, fyrirtækja og umhverfis. Áfangastaðaáætlun er sameiginleg stefnuyfirlýsing sem hefur það að markmiði að stýra uppbyggingu og þróun svæðis yfir ákveðinn tíma, skilgreina hlutverk hagsmunaaðila og tiltaka beinar aðgerðir. Í nýjustu útgáfu áætlunarinnar hverju sinni er einnig settur fram listi uppbyggingarverkefna sem forsvarsfólk sveitarfélaga setur í forgang á sínu svæði.
Fyrsta áfangastaðaáætlunin fyrir Norðurland var gefin út árið 2018 og var hún unnin í samstarfi við Ferðamálastofu, sem og breiðan hóp hagaðila. Í tengslum við vinnslu fyrstu áætlunarinnar var unnin greiningarvinna, sem lagði grunn að stefnu um þróun ferðaþjónustu á Norðurlandi og skilgreiningu lykilverkefna.
Áfangastaðaáætlun Norðurlands er í dag eingöngu gefin út á vefformi og er ætlað að vera lifandi upplýsinga- og stjórnunartæki. Áætlunin er uppfærð reglulega hvað varðar verkefnaáherslur og stöðu verkefna, sem og greiningar og talnagögn.
Lykilhagaðilar eru ferðaþjónustufyrirtæki og sveitarfélög á Norðurlandi. Aðrir hagaðilar eru þeir sem hafa beinan eða óbeinan hag af ferðaþjónustu á viðkomandi svæði. Áfangastaðaáætlun getur einnig nýst hagaðilum utan svæðis, en í gegnum áfangastaðaáætlun geta fulltrúar stjórnvalda og stoðkerfis fengið skýra mynd af starfsemi ferðaþjónustunnar á Norðurlandi og áherslum og verkefnum MN. Sjá nánar hér.
Við mótun áfangastaðaáætlunar er unnið í nánu samstarfi við sveitarfélög og er mikilvægur hluti áætlunarinnar listi staðbundinna uppbyggingarverkefna sem forsvarsaðilar hvers og eins sveitarfélags á Norðurlandi hafa valið að setja í forgang. Verkefnin eru misstór og byggja á þörfum hvers sveitarfélags en eiga það sammerkt að bæta aðgengi að áfangastöðum eða búa til nýja þar sem bæði er gætt að því að byggja upp grunnþjónustu og að því að bæta upplifun ferðamanna.
