Skipting gistinátta eftir árstíma

ATH. Þegar myndritin hér að neðan eru skoðuð er mælt með því að opna þau á heilum skjá. Það er gert með því að smella á hnappinn efst í hægra horni hverrar myndar og velja "allur skjárinn".

Umfang ferðaþjónustu á Norðurlandi sveiflast verulega eftir árstímum. Árstíðasveiflan sést glögglega ef dreifing gistinátta er skoðuð eftir mánuðum. Hlutfall gistinátta yfir sumarmánuðina (maí til og með ágúst) á árinu 2025 var um 67% gistinátta ársins, en 33% gistinátta dreifast yfir aðra mánuði ársins. Ef skoðuð er dreifing gistinátta erlendra gesta eftir árstímum, er hlutfallið 65% vs. 35%. Gistinætur Íslendinga yfir sumarmánuðina eru 72% af gistináttum þeirra yfir árið, en 28% gistinátta eiga sér stað á vetrartíma. Árstíðarsveifla gistinátta Íslendinga er því nokkru meiri en árstíðasveifla gistinátta erlendra gesta.

Ef skoðuð er dreifing gistinátta eftir þjóðerni gesta kemur í ljós að árstíðarsveiflan er nokkuð mismunandi eftir því hvaða þjóðerni er skoðað. Myndin hér að neðan sýnir dreifingu gistinátta gesta frá þeim 12 löndum sem standa baki flestum gistinóttum á Norðurlandi árið um kring.

Ef horft er til dreifingu gistinátta gesta frá Norður Ameríku og Evrópu, þá er árstíðasveifla gistináttafjölda Breta minnst, eða 54% gistinátta yfir vetrartíma og 46% yfir sumartíma. Yfir þriðjungur gistinátta gesta frá Bandaríkjunum, Sviss og  Spáni eiga sér einnig stað yfir vetrartímann. Gestir frá Asíu verja fleiri gistináttum á Norðurlandi yfir vetrartímann en sumartímann.,en um 60% gistinátta Kínverja eiga sér stað yfir vetrartíma og yfir 64% gistinátta gesta frá öðrum Asíulöndum

Árstíðasveiflan er hins vegar mest ef skoðaðar eru gistinætur Pólverja og Frakka, en aðeins 22% þeirra falla á vetrartíma, en 78% á sumartíma.

Árstíðasveifla ferðaþjónustu er veruleg í öllum sveitarfélögum Norðurlands. Myndin hér að neðan sýnir fjölda gistinátta á öllum tegundum gististaða eftir sveitarfélögum á árinu 2025, sem og skiptingu í hverju sveitarfélagi milli gistinátta yfir sumartíma (maí til og með ágúst) og vetrartíma (restin af árinu). Akureyri og aðliggjandi sveitarfélög skera sig nokkuð úr, en þar eiga gistinætur yfir vetrartíma stærri hlut í heildarfjölda gistinátta. Ath. hér er horft til allra gistinátta innlendra og erlendra gesta. Ef eingöngu er horft til gistinátta erlendra gesta er árstíðastveiflan í flestum tilfellum sambærileg og ef horft er til gistinátta bæði innlendra og erlendra , enda erlendi hópurinn mun stærri og því ráðandi í heildartölunum.