Jarðhitasvæði

Námafjall og nágrenni þess eru meðal virkustu háhitasvæða landsins. Austan við fjallið er jarðhitasvæðið Hverir, þar sem gufustrókar, sjóðandi leirhverir og litskrúðugar steinefnaútfellingar skapa einstakt landslag sem minnir helst á annan heim. Svæðið liggur á þéttu sprungubelti og gefur einstaka innsýn í þá öflugu jarðfræðilegu krafta sem móta Mývatnssveitina. Á Hverum eru fjölmargir gufu- og leirhverir, en þar finnast engir vatnshverir. Jarðvegurinn er súr og gróðurlaus vegna áhrifa frá hveralofti og brennisteini, sem setur svip sinn á hið sérstaka umhverfi svæðisins. Göngustígar liggja um svæðið og mikilvægt er að halda sig á merktum leiðum þar sem jarðvegur getur verið heitur og viðkvæmur.

Kverkfjöll erul megineldstöð í norðurbrún Vatnajökuls. Fjöllin eru nefnd eftir kverkinni sem skriðjökullinn Kverkjökull rennur niður úr. Í honum er stórfenglegur íshellir. Á svæðinu eru mjög áhugaverðar gönguleiður um eitt mesta háhitasvæði landsins. Frá svonefndri Austurleið (F910) liggur Kverfjallaleið (F902) suður til Kverkfjalla. Skammt austar liggur Hvannalindaleið (F903) suður í Hvannalindir og áfram þar sem hún kemur inn á veg F902. Vegir að Kverkfjöllum eru einungis opnir á sumrin frá lok júní til loka ágústs. Einungis er fært jeppum, hægt að sjá frekari upplýsingar á www.vegagerdin.is. .

Hveravellir eru þekkt jarðhitasvæði á miðhálendi Íslands, norðan undir Kjalhrauni. Svæðið er þekkt fyrir gufuhveri, hveraaugu og litríkar jarðmyndanir sem skapa sérstakt landslag í hjarta hálendisins. Hveravellir tengjast einnig sögu hins fræga útilegumanns Fjalla-Eyvindar og Höllu konu hans, sem dvöldu þar um skeið á 18. öld. Enn í dag má sjá minjar sem tengjast veru þeirra á svæðinu. Einn af helstu aðdráttaraflum Hveravalla er náttúrulega heita laugin þar sem gestir geta slakað á og notið útsýnis yfir hið víðfeðma hálendi. Hveravellir eru vinsæll viðkomustaður á Kjalvegi og bjóða upp á einstaka blöndu af náttúru, sögu og útivist.