Njóttu með fjölskyldunni

Bjarg í Miðfirði er fæðingarstaður Grettis sterka Ásmundarsonar en hann fæddist í lok 10. aldar og sagan segir að hann hafi manna lengst verið í útlegð á Íslandi eða í 19 ár alls. Grettissaga er ein af perlum íslenskra bókmennta og hefur lifað í gegnum aldirnar á skinnhandritum og í frásögnum sögumanna, þá hefur sagan verið uppspretta  ótal hugmynda listamanna og rithöfunda. Sagan um Gretti sterka verður sýnileg við Grettisból á Laugarbakka, en þar er verið að byggja upp leikvang með áherslu á hreysti og hæfni, aflraunir með þátttöku gesta, allt í anda frægðarsagna íslenskra fornkappa. Frá árinu 1996 hafa verið haldnar árlega Grettishátíðir á slóðum Grettis með sérstakri menningardagskrá. Leiðsögn er um fæðingarstað Grettis að Bjargi og saga hans rakin. Einnig er keppt í aflraunum þar sem tekist er á við hin ýmsu "Grettistök". Nánari upplýsingar um Grettishátíðina.

Í Dalvíkurhöfn er lítil trébrú þar sem hægt er að komast að svartri sandströnd. Hægt er að ganga að Svarfaðardalsá. Takið ykkur tíma, stoppið og fylgist með fjölbreyttu fuglalífi á leiðinni. 

Krossanesborgir er svæði alsett klettaborgum eða stuttum klappaásum fyrir norðan Akureyri. Svæðið var friðlýst að hluta árið 2005 sem fólkvangur. Í borgunum er 5-10 milljóna ára basalt, sem myndar berggrunn Akureyrar. Langflestar borganna eru nokkurn veginn eins og ísaldarjökullinn skildi við þær fyrir um 10 þúsund árum. Þær liggja í óreglulegum röðum og þyrpingum, en á milli þeirra eru oftast mýrarsund, og tjarnir í sumum þeirra. Mikill gróður er í tjörnum á svæðinu, sérstaklega Djáknatjörn, en þar vaxa margar nykrutegundir, m.a. hin sjaldgæfa langnykra. Gróðurfar í borgunum er fjölbreytt og hafa þar fundist um 190 plöntutegundir, þar af 16 starategundir. Þetta er um 40% allra íslenskra blómplantna og byrkninga. Fuglalíf er fjölbreytt, þar verpa um 27 tegundir fugla eða um 35% af öllum íslenskum fuglategundum.  Heimild: heimasíða Umhverfisstofnunar.  Árið 2014 voru hönnuð upplýsingaskilti fyrir svæðið og má sjá þau hér fyrir neðan:  Yfirlitskort  Kort af gönguleiðum Áveituskurður Jurtir - blóm Fuglar - endur Fuglar - rjúpan  Fuglar - mávar  Tré og runnar Mófuglar Jarðfræði  Eyðibýlið Lónsgerði  Stríðsminjar  Votlendisplöntur

Höfði er klettatangi sem gengur út í Mývatn. Útsýni er allgott af Höfðanum yfir Mývatn, voga þess og víkur og er kjörinn staður til fuglaskoðunar. Kálfastrandarvogur liggur meðfram Höfðanum og er sérstæður fyrir hraundrangamyndanir í voginum og við hann. Þessir drangar heita Klasar og Kálfastrandarstrípar en Kálfastrandarvogur og umhverfi Höfða þykir með fegurstu stöðum við Mývatn.

 Kjarnaskógur er eitt vinsælasta útivistarsvæði Akureyringa, um800 hektara að stærð. Við upphaf skógræktar á svæðinu um 1950 var landiðskóglaust með öllu. Síðan þá hefur verið plantað um 1.5 milljónum plantna og erþar mikil gróðursæld og gott skjól. Trjágróður í Kjarnaskógi er afarfjölbreyttur og trjásýnistígur liggur um hjarta skógarins meðfram Brunná.   ​Í skóginum má m.a. finna:* Þrjú leiksvæði með fjölda leiktækja* Blakvelli og trimmtæki* Yfirbyggðar grillaðstöður sem hentar jafnt einstaklingum sem hópum* Stærsta skipulagða gönguskíðasvæði landsins (í skóglendi) með allt að 20 kmtroðnum brautum, þar af eru 6 km upplýstir. Hægt er að nálgast upplýsingarum færð gönguskíðasvæðisins hér ,en litirnir á kortinu gefa til kynna tímann frá því að síðast var troðið(grænt, appelsínugult og bleikt eru frá nokkrum klukkustundum upp í 48 klst,meðan ljósblátt, dökkblátt og grátt er frá 2 upp í fleiri en 14 sólarhringar).* Á veturna er einnig boðið upp á sleðabrekkur þegar hægt er og eru þær viðEinar skógarvörð og fyrir neðan Sólúrið á Kjarnatúni.* Sérhönnuðu fjallahjólabraut með tengingu við fjallahjólabrautina íHlíðarfjalli - sem samanlagt gerir x km og þarmeð lengstu fjallahjólabrautlandsinsssss.* Um 12 km af malarbornum stígum, þar af eru 6 km upplýstir, auk fjölda annarraskógarstíga. Sjá kort neðan á síðunni. * Snyrtingar og vatnsbrunnur* 4 bílastæði  Svæðið er í eigu Akureyrarbæjar en í umsjá SkógræktarfélagsEyfirðinga.  Skógræktarfélag EyfirðingaSími: 462 4047Netfang: ingi@kjarnaskogur.isHeimasíða: www.kjarnaskogur.is Kort af svæðinu:Kjarnaskógur - léttleiða korthttps://www.visitakureyri.is/static/files/2012-VISIT/pdf/kjarnasogur-lettleidir-1-.pdfKjarnaskógur - allar leiðar - stórt kort https://www.visitakureyri.is/static/files/2012-VISIT/pdf/kort-2018-stora-kortid-a-orva-a2.pdfHamrarhttps://www.visitakureyri.is/static/files/2012-VISIT/pdf/kort-2018-hamrar-lett-an-orva.pdfNaustaborgirhttps://www.visitakureyri.is/static/files/2012-VISIT/pdf/kort-2018-naustaborgir-lett-an-orva.pdfGönguskíðabrautirhttps://www.visitakureyri.is/static/files/2012-VISIT/pdf/gonguskidi.pdf 

Höfðagerðissandur heitir breið sandfjara milli Héðinshöfða og Eyvíkur. Höfðagerðissandur er vinsælt útivistarsvæði Tjörnesinga og Húsvíkinga og er talvalin staður fyrir göngu- og hlaupatúra. Frá fjörunni sést til Lundeyjar. Höfðagerðissandur er 5km norðan við Húsavík, keyrt er úr bænum framhjá PCC og átt að Tjörnesi og er afleggjari til vinstri þar sem er hægt að leggja bílnum.  

Naustaborgir eru vinsælt útivistarsvæði sunnan Akureyrar og hluti af samfelldu náttúrusvæði sem tengist Kjarnaskógi. Svæðið dregur nafn sitt af sérstæðum klettaborgum sem setja svip sinn á landslagið og skapa fallega umgjörð um gönguleiðir og útivist. Um Naustaborgir liggja fjölbreyttir göngustígar sem tengja svæðið bæði við Kjarnaskóg og nærliggjandi útivistarsvæði. Frá hæstu klettaborgunum er fallegt útsýni yfir Akureyri, Eyjafjörð og nærliggjandi sveitir, sem gerir svæðið að vinsælum áfangastað fyrir göngufólk og náttúruunnendur. Í Naustaborgum er einnig votlendi sem gegnir mikilvægu hlutverki fyrir fugla- og plöntulíf. Þar er fuglaskoðunarhús sem veitir góða aðstöðu til að fylgjast með fjölbreyttu fuglalífi svæðisins. Unnið hefur verið að endurheimt votlendisins á síðustu árum til að styrkja náttúruleg búsvæði og auka líffræðilega fjölbreytni. Naustaborgir bjóða upp á einstaka blöndu af náttúrufegurð, útivist og fuglaskoðun í stuttri fjarlægð frá miðbæ Akureyrar. 

Hægt er að leggja bílnum í bænum og fara í göngutúr að fallegri svartri strönd, gengið er í átt að Kleifum. Einnig er hægt að komast að ströndinni á bíl en verið viss um að leggja á afmörkuð bílastæði. 

Í Hverfjalli er stór, hringlaga sprengigígur, um 140 m djúpur og um 1000 m í þvermál. Hverfjall er í röð fegurstu og reglubundnustu sprengigígamyndana sem getur að líta á Íslandi og talið í röð þeirra stærstu sinnar tegundar á jörðinni. Telja má víst að gígurinn hafi myndast við sprengigos og er aldur þess áætlaður 2800-2900 ár.

Lystigarður Akureyrar er ein af fegurstu perlum bæjarins og vinsæll áfangastaður fyrir bæði heimamenn og gesti. Garðurinn var stofnaður árið 1912 fyrir frumkvæði kvenna í bænum og stóð Anna Schiöth þar í fararbroddi. Í garðinum má sjá brjóstmynd af tengdadóttur hennar, Margarethe Schiöth, sem hélt starfinu áfram og átti stóran þátt í uppbyggingu garðsins. Á stöpul hennar eru letruð orðin: „Hún gerði garðinn frægan.“ Í dag er Lystigarðurinn í eigu Akureyrarbæjar og hefur þróast í einn merkasta grasagarð landsins. Þar má finna nær allar innlendar plöntutegundir Íslands auk þúsunda erlendra tegunda sem dafna vel í hagstæðu skjóli Eyjafjarðar. Fjölbreyttur gróður, falleg blómabeð og friðsælt umhverfi gera garðinn að vinsælum stað til göngu og útiveru. Garðurinn er formlega opinn frá 1. júní til 30. september, en hlið hans standa opin allt árið og gestum er ávallt velkomið að njóta kyrrðarinnar og náttúrunnar. Á heimasíðu Lystigarðsins má einnig finna fjölbreyttar upplýsingar um plöntur, sögu garðsins og starfsemi hans. 

Dimmuborgir við Mývatn eru einstakt hraunsvæði sem einkennist af stórbrotnum hraunmyndunum, hellum og klettaborgum af ýmsum stærðum og gerðum. Dimmuborgir eru taldar hafa myndast þegar hraun rann yfir votlendi fyrir um tvö þúsund árum. Við það urðu til hinar sérkennilegu hraunmyndanir sem einkenna svæðið í dag.  Um Dimmuborgir liggja fjölbreyttar gönguleiðir sem gefa gestum kost á að skoða svæðið og njóta hins sérstaka landslags. Meðal þekktustu myndana er Kirkjan, glæsileg hraunhvelfing sem minnir á kirkjuskip og hefur um árabil verið eitt helsta kennileiti svæðisins. Dimmuborgir tengjast einnig íslenskum þjóðsögum og eru sagðar heimkynni jólasveinanna. Svæðið er vinsælt allt árið um kring, en yfir vetrarmánuðina fá hraunmyndanirnar á sig sérstakan blæ þegar þær hyljast snjó. 

Sellátur er svæði nærri sjó þar sem selir kæpa. Sellátur er að finna víðast hvar þar sem selir halda sig og er Vatnsnesið eitt helsta selaskoðunarsvæði Norðurlands. Látur eru yfirleitt nærri flæðarmálinu og selirnir liggja þar á fjöru en svamla í sjónum á flóði. Í einu látri geta verið allt frá fáeinum dýrum upp í mörg hundruð.

Þrístapar eru þrír hólar í vestandverðum Vatnsdalshólum skammt norðan við hringveginn. Þar fór fram síðasta opinbera aftakan á Íslandi þann 12. janúar 1830 en þá voru Friðrik Sigurðsson og Agnes Magnúsdóttir hálshöggvin fyrir morðin á Natani Ketilssyni og Pétri Jónssyni á Illugastöðum 1828. Böðullinn, Guðmundur Ketilsson, var bróðir Natans. Öxin og höggstokkurinn eru varðveitt á Þjóðminjasafni Íslands en afsteypa af öxinni er til sýnis á Þrístöpum. Til er frásögn af konu í Reykjavík sem árið 1932 kom á framfæri skilaboðum og óskum að handan sem leiddu til þess að höfuð Agnesar og Friðriks fundust og jarðneskar leifa þeirra voru jarðsettar að Tjörn á Vatnsnesi árið 1934. Sögu Agnesar hefur verið gerð góð skil í sögulegu skáldsögunni Náðarstund eftir Hannah Kent sem kom út á íslensku 2014. Nú er í vinnslu kvikmynd þar sem Jennifer Lawrence fer með hlutverk Agnesar. Áður hafði María Ellingsen leikið Agnesi í samnefndri kvikmynd sem kom út árið 1995. Aðrar bækur sem helgaðar eru þessum atburðum eru Yfirvaldið eftir Þorgeir þorgeirsson, Enginn má undan líta eftir Guðlaug Guðmundsson og Saga Natans Ketilssonar og Skáld-Rósu eftir Brynjúlf Jónsson frá Minna-Núpi. Á Þrístöpum er sögu Agnesar og Friðriks gerð góð skil og vel þess virði að staldra þar við og taka göngutúr um svæðið. Sumarið 2024 var sett upp hljóðleiðsögn um svæðið, sem hægt er að hlusta á hér: https://thristapar.newreality.is/

Gásir er einn af merkustu minjastöðum á Norðurlandi enda best varðveitti miðaldakaupstaður hér á landi. Gásir er einstakur sögustaður sem er víða getið í rituðum heimildum og er sú elsta frá 1162. Á Gásum var verslað, unnið var að handverki og iðnaði. Hugsanlegt er að verslun á Gásum hafi staðið allt þar til verslun hófst á Akureyri um 1550. Á Gásum fór fram fornleifa- og gróðurfarsrannsókn 2001-2006 undir stjórn Minjasafnins á Akureyri. Rústir hins forna kaupstaðar er friðlýstur og í umsjón Fornleifaverndar ríkisins. Svæðið hefur alþjóðlegt náttúruverndargildi vegna fuglalífs en þar eru einnig sjálfgæfar plöntutegundir. Nánari upplýsingar á www.gasir.is

Flatey á Skjálfanda er stærsta eyjan í Skjálfandaflóa og einn af friðsælustu áfangastöðum Norðurlands. Eyjan liggur skammt undan landi við Flateyjardal og er þekkt fyrir fjölbreytt fuglalíf, sögulega byggð og kyrrlátt umhverfi. Flatey var áður blómlegt sjávarþorp og um miðja 20. öld bjuggu þar yfir eitt hundrað manns. Þótt engin föst búseta hafi verið á eyjunni síðan 1967 standa mörg húsanna enn og mynda einstaka heild ásamt kirkjunni, skólanum, vitanum og gömlu hafnarsvæðunum. Á sumrin lifnar eyjan aftur við þegar afkomendur fyrrum íbúa og gestir heimsækja staðinn. Eyjan er vinsæll áfangastaður fyrir fuglaáhugafólk en þar má sjá fjölmargar fuglategundir yfir sumarmánuðina. Gönguferð um eyjuna býður upp á fallegt útsýni, rólegt andrúmsloft og einstakt tækifæri til að kynnast sögu og náttúru Skjálfandaflóa. Hægt er að heimsækja Flatey sjóleiðina frá Húsavík yfir sumartímann. 

Ánastaðastapi er sérkennilegur og hvassbrýndur klettadrangur við strönd Vatnsness, norðan við bæinn Ánastaði. Kletturinn hefur mótast af ágangi sjávar og veðra í gegnum aldirnar og stendur sem áberandi kennileiti við strandlengjuna. Frá bílastæði við veg 711 liggur stutt gönguleið niður að sjó þar sem stapinn blasir við. Svæðið býður upp á fallega strandnáttúru, ferskt sjávarloft og víðáttumikið útsýni yfir Húnaflóa. Á leiðinni má einnig sjá ýmsa klettadranga og njóta kyrrðarinnar við ströndina. Ánastaðastapi tengist merkilegum atburði í sögu svæðisins. Vorið 1882 rak fjölda stórhvela á land við Hvalshöfða, litla vík skammt frá stapanum. Hvalreki þessi varð mikilvæg búbót fyrir íbúa héraðsins og er sagður hafa hjálpað mörgum í gegnum erfiða tíma. Fyrir þá sem vilja lengri göngu er hægt að fylgja strandlengjunni í suðurátt að Grímsá og njóta fjölbreyttrar fjöru, klettamyndana og náttúrunnar á Vatnsnesi. Athugið að svæðið getur verið lokað fram í júlí vegna sauðburðar. 

Malarvegur nr. 869 leiðir þig á Langanesið. Nálægt bænum Ytra-Lóni er falleg fjara, ein fárra fjara á Íslandi sem er ekki með svörtum sand. Hér gefst gott tækifæri til að fylgjast með ríku fuglalífi svæðisins og er lítið fuglahús í nágrenninu. Ekki missa af því að ganga þessa fallegu strönd.   Lambanes er aðgengilegt á sumrin.  

  Spákonufellshöfði er vinsælt útivistarsvæði skammt frá höfninni á Skagaströnd. Þar hafa verið merktar gönguleiðir og sett upp fræðsluskilti um fugla og gróður. Á björtum sumarkvöldum má sjá miðnætursólina setjast við hafasbrún í norðri. Raunar ganga heimamenn um Höfðann allan ársins hring og njóta þess sem hann býður upp á.

Húsavíkurfjall er 417 metrar og er þægileg gönguleið er á fjallið frá þjóðvegi norðan Húsavíkur. Byrjað er hjá tjaldsvæðinu og gengið eftir góðum bröttum vegslóða. Fallegt útsýni yfir Húsavík og Skjálfanda. Einnig sjást eyjurnar Flatey og Lundey.  

Borgarvirki á Vatnsnesi er klettaborg úr 10-15 metra háu stuðlabergi. Virkið er gostappi og tilgáta er um að þar hafi verið héraðsvirki og barist til forna. Á Borgarvirki er útsýnisskífa og þar er mjög víðsýnt yfir stóran hluta héraðsins. Einstakt náttúrufyrirbæri, endurbætt af mönnum fyrr á öldum. Sagan segir að þar hafi Víga-Barði Guðmundsson í Ásbjarnarnesi verið á ferð. Hann deildi við Borgfirðinga eins og segir frá í Heiðarvíga sögu. Sagt er að óvinir hans hafi komið að sunnan með óvígan her en Barði barst af því njósnir og kom sér og sínum mönnum fyrir í Borgarvirki, þar sem ómögulegt reyndist að sækja að honum. Tóku Borgfirðingar á það ráð að ætla að svelta Barða og hans menn inni. Þegar matinn þraut tóku virkisbúar sig til og hentu síðasta mörsiðrinu (sláturkeppnum) út úr virkinu. Voru þá Borgfirðingar vissir um að Barði hefði nægar vistir og héldu heim á leið. Frábært útsýni er úr Borgarvirki og þar hefur verið sett upp útsýnisskífa. 

Heimskautsgerðið á Melrakkaási við Raufarhöfn er einstakt listaverk og minnismerki sem sækir innblástur í norræna goðafræði, stjörnufræði og samspil sólarljóss, skugga og árstíðaskipta. Gerðið er oft líkt við Stonehenge, en það er hannað til að fanga sólargeisla, varpa skuggum og skapa samspil ljóss og forms í takt við árstíðir og gang sólarinnar. Hugmyndin að Heimskautsgerðinu er sprottin úr vangaveltum Erlings Thoroddsen um hvernig mætti nýta hina endalausu víðáttu, miðnætursólina og heimskautsbirtuna sem einkenna svæðið. Listamaðurinn Haukur Halldórsson þróaði hugmyndina áfram og hannaði mannvirkið með vísunum í dvergatal Völuspár og fornan sagnaheim. Heimskautsgerðið er um 50 metrar í þvermál og hlið þess snúa til höfuðáttanna. Í miðju þess rís súla sem gegnir lykilhlutverki í samspili ljóss og skugga. Innan gerðisins má einnig finna ýmis táknræn verk sem tengjast tíma, áttum, náttúruöflum og stjörnuhimninum. Á hæðinni fyrir ofan Raufarhöfn býður Heimskautsgerðið upp á víðáttumikið útsýni yfir hafið og víðerni Norðausturlands. Mannvirkið er enn í uppbyggingu en hefur þegar skipað sér sess sem einn af áhugaverðustu menningar- og áfangastöðum Norðurlands.  Nánari upplýsingar um hugmyndafræði Heimskautsgerðisins er að finna á heimasíðunni www.heimskautsgerdi.is.   Heimskautsgerðið er 50 km frá Kópaskeri, 54 km frá Þórhöfn og 154 km frá Húsavík. Hér má sjá leiðina.

Austan við Sauðárkrók er falleg svört sandströnd. Auðvelt er að leggja bílnum við vesturenda strandarinnar og fara í göngutúr til að njóta útsýnisins yfir Skagafjörð. Auðveld ganga sem hentar öllum og skemmtilegt að týna gersemar sem finnast á ströndinni.   

Hvítserkur er 15 metra hár klettadrangur við austanvert Vatnsnes og eitt þekktasta kennileiti Norðurlands. Kletturinn hefur mótast af ágangi sjávar í gegnum aldirnar og þykir líkjast risavaxinni veru sem drekkur úr sjónum. Hvítserkur er vinsæll áningarstaður fyrir náttúruunnendur og fuglalíf er mikið á svæðinu. Einnig er hægt að ganga niður í fjöruna og skoða klettinn úr návígi. Samkvæmt þjóðsögu er Hvítserkur steinrunninn tröllkarl frá Ströndum sem ætlaði að brjóta kirkjuklukkur Þingeyrarkirkju. Hann náði ekki áfangastað áður en sólin reis og breyttist því í stein í fyrstu geislum morgunsins. 

Skúlahóll er einn af Vatnsdalshólunum óteljandi, hann stendur við stöðuvatnið Flóðið og af honum er gott útsýni yfir Flóðið og fram Vatnsdal.  Auðvelt er að komast upp á Skúlahól því þar hafa verið lagðar tröppur og þegar upp er komið er hægt að tylla sér á bekk og njóta útsýnis. Frá Skúlahól er örstutt í Listakot Dóru. Þetta svæði er hluti af eylendinu í Vatnsdal sem nær meðfram Vatnsdalsá frá Brúsastöðum og Hofi, um Flóðið og Húnavatn til sjávar. Svæðið er á náttúruminjaskrá vegna vistgerða og fulgalífs.Fjölbreytt fuglalíf er á svæðinu og þá sérstaklega á fartíma er það hefur alþjóðlegt gildi fyrir álftir, helsingja og sem fjaðrafellistaður álfta. 

Botnsvatn er fallegt stöðuvatn skammt suðaustan við Húsavík og vinsælt útivistarsvæði meðal heimamanna og gesta. Vatnið er 1,05 km² að flatarmáli og liggur í um 130 metra hæð yfir sjávarmáli. Aðkoman er auðveld en aðeins tekur nokkrar mínútur að aka frá miðbæ Húsavíkur upp að vatninu. Frá Botnsvatni fellur Búðará sem rennur í gegnum Húsavík á leið sinni til sjávar. Umhverfi vatnsins einkennist af fallegri náttúru og friðsælu andrúmslofti sem gerir það að vinsælum stað til göngu, útiveru og náttúruskoðunar. Vinsæl gönguleið liggur hringinn í kringum vatnið og er um 5,4 kílómetra löng. Einnig er hægt að ganga frá Skrúðgarði á Húsavík eftir merktum göngustíg sem fylgir Búðará upp að vatninu. Á leiðinni gefst tækifæri til að njóta útsýnis yfir Húsavík, Skjálfanda og nærliggjandi náttúru. 

Ásbyrgi er eitt af stórbrotnustu náttúruundrum Íslands og hluti af Vatnajökulsþjóðgarði. Þetta skeifulaga gljúfur er umlukið tignarlegum hamraþiljum sem rísa allt að 100 metra yfir botn gljúfursins og skapa einstaka náttúruupplifun. Samkvæmt þjóðsögum myndaðist Ásbyrgi þegar Sleipnir, áttfættur hestur Óðins, steig fæti til jarðar og skildi eftir sig hóffar sitt. Vísindamenn telja hins vegar að gljúfrið hafi mótast í miklum jökulhlaupum fyrir þúsundum ára.  Í og við Ásbyrgi liggja fjölbreyttir göngustígar sem henta bæði stuttum gönguferðum og lengri útivist. Svæðið er skógi vaxið og þar má njóta fjölbreytts gróður- og fuglalífs í friðsælu umhverfi. Í Ásbyrgi er einnig vinsælt tjaldsvæði og fallegur golfvöllur sem gerir svæðið að eftirsóttum áfangastað fyrir þá sem vilja dvelja lengur og njóta náttúrunnar.  Ásbyrgi er fallegt á öllum árstímum, en á haustin setja litskrúðugir haustlitir sérstakan svip á gljúfrið og umhverfi þess. Kyrrðin, náttúrufegurðin og fjölbreyttir útivistarmöguleikar gera Ásbyrgi að einum vinsælasta áfangastað Norðurlands.  Ásbyrgi er hluti af Demantshringnum: www.demantshringurinn.is 

Leiðin austur eftir vegi nr.85, liggur eftir bröttum klettum Tjörnes og niður á flata svæðið í Öxarfirði. Þegar komið er niður brekkuna blasir við löng sandströnd og er lítið bílastæði vinstramegin við veginn. Kjörið tækifæri til að leggja bílnum þar og taka sér göngutúr eftir svartri sandströndinni og njóta ferska sjávarloftsins og útsýnisins.  Vinsamlegast ekki reyna að keyra eftir ströndinni.