Stöðuskýrslur Flugklasans
Árið 2026 var birt skýrsla með niðurstöðum rannsóknar á samfélagslegum áhrifum millilandaflugs á Norður- og Austurlandi. Rannsóknin var unnin í samstarfi Háskóla Íslands og Markaðsstofu Norðurlands með stuðningi Sóknaráætlunar Norðurlands eystra, Sóknaráætlun Austurlands og Rannsóknasjóðs Háskóla Íslands. Höfundur skýrslunnar er Þóroddur Bjarnason, prófessor í félagsfræði við Háskóla Íslands.
Niðurstöður rannsóknarinnar sýna að:
- Beint millilandaflug frá Akureyrarflugvelli hefur bætt lífsgæði íbúa á Norður- og Austurlandi með því að auðvelda utanlandsferðir vegna afþreyingar, fjölskyldu og vinnu.
- Áhersla stefnumótandi byggðaáætlunar á uppbyggingu millilandaflugs frá Akureyri og Egilsstöðum hefur skilað umtalsverðum árangri og fjárstuðningi opinberra aðila við millilandaflugið um Akureyrarflugvöll virðist hafa verið vel varið. (Mikilvægt er að tryggja stuðning við þetta verkefni til framtíðar og leita leiða til að stuðla einnig að reglubundnu millilandaflugi um Egilsstaðaflugvöll.)
- Það sem er sérstakt á Íslandi er að sami opinberi aðilinn (Isavia) og sami flugrekandinn (Icelandair) starfrækja innanlandsflug og millilandaflug með gerólíkum hætti og bjóða ekki upp á einfaldar, ódýrar tengingar á milli innanlandsflugvallarins í Reykjavík og millilandaflugvallarins í Keflavík.
Flugþróunarsjóður lét vinna skýrslu um efnahagsleg áhrif millilandaflugs um Akureyri haustið 2024. Jón Þorvaldur Heiðarsson, lektor við Háskólann á Akureyri, vann skýrsluna sem byggði á flugi easyJet frá Bretlandi veturinn 2023-2024.
Helstu niðurstöður skýrslunnar eru þessar:
- Fjárfesting Flugþróunarsjóðs í beinu millilandaflugi skilar sér til strax til baka í formi beinna skatttekna
- Aukið millilandaflug er gríðarleg innspýting fyrir ferðaþjónustu á Norðurlandi á lágönn
- Mikill sparnaður fyrir Norðlendinga að geta flogið beint til útlanda, s.s. í formi styttri ferðatíma, minni akstri og þ.a.l. minni útblæstri gróðurhúsalofttegunda
Haustið 2022 lét Flugklasinn gera greiningu mögulegri þörf á gistirými á Norðurlandi, sérstaklega með tilliti til aukinna sumsvifa flugfélaga um Akureyrarflugvöll. Niðurstöðurnar gáfu til kynna að Norðurland væri ekki í stakk búið að taka við mikilli aukningu ferðamanna yfir háannatímann. Þessar niðurstöður voru hvatning til fjárfestinga í greininni sem síðar varð raunin.
Sviðsmyndagreining, nóvember 2019
Markaðsstofa Norðurlands hefur látið meta ávinning af reglubundnu millilandaflugi um Akureyrarflugvöll. Settar voru fram fjórar mismunandi sviðsmyndir og ávinningurinn metinn út frá forsendum hverrar sviðsmyndar fyrir sig. Jón Þorvaldur Heiðarsson, hagfræðingur og lektor við Háskólann á Akureyri, gerði þetta mat og tölurnar sem hér eru birtar eru teknar úr greinargerð hans, sem má skoða með því að smella hér.
Sjá myndræna framsetningu á skýrslu
