Útilega

Norðurland býður upp á fjölbreytt úrval tjaldsvæða í fallegu umhverfi, allt frá friðsælum sveitasvæðum til tjaldsvæða nálægt bæjum, afþreyingu og vinsælum ferðamannastöðum. Flest tjaldsvæði eru opin frá maí og fram í september, þó opnunartími geti verið mismunandi eftir staðsetningu.

Hvort sem þú ferðast með tjald, fellihýsi, hjólhýsi eða húsbíl finnurðu tjaldsvæði sem hentar þínum ferðamáta. Á flestum tjaldsvæðum er góð hreinlætisaðstaða og víða er boðið upp á sturtur, rafmagn og aðra þjónustu. Aðstaða getur þó verið mismunandi milli tjaldsvæða og því er gott að kynna sér upplýsingar um hvert svæði áður en lagt er af stað.

Útilega er stór hluti af íslensku sumri og tjaldsvæðin skapa frábæran vettvang til að njóta náttúrunnar, ferðast um Norðurland og hitta annað ferðafólk.

Tjöld utan tjaldsvæða

Á Íslandi er heimilt að tjalda eina nótt á óræktuðu landi, svo framarlega sem ekki eru skýrar takmarkanir eða bann við tjöldun. Landeigendur geta merkt svæði þar sem tjöldun er óheimil og hópar þurfa ávallt að fá leyfi landeiganda áður en tjaldað er utan merktra tjaldsvæða.

Óheimilt er að tjalda utan tjaldsvæða innan þéttbýlis.

Gisting fyrir þá sem vilja tvinna saman nútíma þægindi og gömlu góðu tjaldútileguna. Þú nýtur flestra þæginda sem finna má á hótelherbergi, en upplifir á sama tíma sjarmann af því að gista úti í guðs grænni náttúrunni. Skemmtileg tilbreyting frá hefðbundnari gistingu.

Fjallaskálar geta verið sérstaklega áhugaverðir og skemmtileg upplifun. Á hálendi Íslands eru fjallakofar og skálar helstu gistimöguleikarnir og eru þeir mismunandi eins og þeir eru margir. Yfirleitt er svefnpokagisting í boði í þessum skálum.  

Hægt er að leigja húsbíla hjá bílaleigum landsins. Vinsamlegast kynnið ykkur reglur um hvar má leggja svoleiðis bílum yfir nótt. 

Mörg gistiheimili, einfaldari hótel, farfuglaheimili og aðilar sem reka bændagistingu, bjóða upp á svefnpokapláss, en það er ódýrara en uppábúið rúm.