Grenivík Gönguleið

Gangan hefst á bílastæðinu skammt frá Útgerðarminjasafninu sem staðsett er í fjöruborðinu. Þaðan er gengið norður eftir Ægissíðu þar til beygt er til vinstri og farið upp að sumarhúsabyggðinni eftir götunni Sunnuhvoli. Síðan er beygt til hægri á Sunnuhlíð og gengið í smá stund til suðurs þar til aftur er beygt til hægri og gengið niður á Hafnarveg. Haldið er áfram til suðurs eftir Hafnarvegi framhjá tjaldstæðinu og íþróttahúsinu og yfir Grenivíkurveg að Grenivíkurvelli. Þaðan liggur leiðin eftir gömlum götuslóða niður að sjó og að upphafsstað. Búið er að byggja upp fallega aðstöðu í kringum Útgerðarminjasafnið og vel þess virði að staldra við og njóta útsýnis út á fjörðinn, til dæmis með því að rölta út á Gömlu bryggju að umhverfislistaverkinu Sókn.