Bæjarganga á Ólafsfirði Gönguleið

Gangan hefst á bílastæðinu við íþróttahúsið, sundlaugina og tjaldstæðið. Farið í átt að tjaldstæðinu og genginn stígurinn fyrir ofan tjörnina þar sem oft er töluvert fuglalíf. Á vegg félagsheimilisins er áhugaverð ljósmyndasýning frá því þegar mikil aurskriða féll á bæinn í ágúst 1988. Þegar búið er að skoða sýninguna er haldið áfram norður eftir aðalgötunni og beygt til vinstri við kaffihús Klöru og gengið sem leið liggur í átt til sjávar. Síðan er gengið meðfram sjónum í suðvesturrátt. Hægt er að príla upp á sjávarkambinn og fá þá gott útsýni yfir sandfjöruna handan ár. Ef tími er nægur er hægt að fara yfir brúna og beygja strax til hægri og ganga eftir fjörunni út á sandinn. En annars er haldið áfram eftir götunni Ægisbyggð, þorpið út á enda þar sem er gott útsýni og svo haldið upp að Menntaskólanum á Tröllaskaga og þaðan aftur á upphafsstað.