Fjöru- og bæjarganga á Svalbarðseyri Gönguleið

Lagt er af stað frá vitanum niður við fjöru og gengið meðfram sjónum í norðurátt eftir fínum slóða. Víða er hægt að bregða sér ofan í fjöruna, anda að sér sjávarloftinu og njóta útsýnis inn og út Eyjafjörðinn. Gengið er norður fyrir seinni tjörnina (Tungutjörn) og beygt upp gamla afleggjarann í átt að Helgafelli og síðan beygt til suðurs inn á vegarslóða sem leiðir inn á götuna Tjarnartún. Við gatnamótin er beygt upp til vinstri á götuna Bakkatún og þaðan inn á stíg sem liggur að skógarreitnum og upp með Valsáránni. Þá er beygt til suðurs inn í íbúðahverfið og genginn stígur sem liggur frá Laugartúni að Smáratúni og sú gata gengin áfram suður þar til komið er á göngustíginn sem liggur niður í fjöru og komið er aftur á upphafsstað. Á brekkunni blasir kirkjan við sem og bærinn Svalbarð þar sem er rekið myndarlegt kúabú.