Tvær hringleiðir á Þórshöfn Gönguleið

Gangan hefst við lystigarðinn, best að fara inn um vestur eða suðurinngang. Gengið er að regnbogahringnum og þá haldið á göngustíginn sem þverar Miðholt (við hliðina á Heilsugæslunni) og Austurveg og haldið upp að íþróttahúsinu. Þaðan er gengið í átt til sjávar framhjá félagsheimilinu Þórsveri og haldið að  Hleinartanga þar sem byggður hefur verið útsýnispallur. Áfram er haldið eftir Bakkavegi, að matvöruversluninni og aftur inn í lystigarðinn og er þá fyrri hringnum lokað. Seinni hringurinn hefst með því að ganga út úr garðinum í átt að leikskólanum og áfram þaðan að göngustígnum að Hálsvegi. Þar er beygt til vinstri og gengið í átt að götunni Miðholti og gengið eftir henni að tjaldsvæðinu. Þá er beygt til hægri og farið eftir stíg sem liggur meðfram ánni, yfir litla trébrú og í gegnum kirkjuskóginn, framhjá nestisaðstöðuskýli og að kirkjunni. Frá kirkjunni er gengið áfram suður Sunnuveginn og út túnið í átt að Ásgarði, síðan reiðveginn ofan við Ásgarð í átt að Fossá og þaðan niður á þjóðveg. Gönguglaðir geta lengt ferðina með því að ganga upp með Fossánni að sunnan og upp að fossinum. En annars er gengið meðfram þjóðveginum og aftur inn í þorpið. Við hafnargarðinn eru fræðandi söguskilti og stuttu þar á eftir er elsta húsið á Þórshöfn, Sandvík sem var byggt 1902. Frá Sandvík er gengið að upphafsstað.