Kjarnaskógur
Kjarnaskógur
Kjarnaskógur er eitt vinsælasta útivistarsvæði Akureyringa og er staðsettur rétt sunnan við bæinn. Skógurinn nær yfir um 800 hektara og þar vaxa meira en 1,5 milljónir trjáa af fjölmörgum tegundum, sem flest hafa verið gróðursett á síðustu 50 árum.
Í Kjarnaskógi er fjölbreytt aðstaða til útivistar og afþreyingar fyrir alla fjölskylduna. Þar má finna göngu- og hjólaleiðir, leiksvæði, áningarstaði og gott rými til að njóta náttúrunnar. Meðfram Brunná liggur trjásýnistígur þar sem hægt er að skoða ólíkar trjátegundir.
Fuglalíf á svæðinu er fjölskrúðugt og við Hundatjörn í Naustaborgum er fuglaskoðunarhús. Tjaldsvæðið að Hömrum er við skóginn og þaðan er greiður aðgangur að gönguleiðum svæðisins.
Aðstaða og afþreying
Í Kjarnaskógi má meðal annars finna:
- Þrjú leiksvæði
- Blakvelli og líkamsræktarsvæði utandyra
- Grillhús og áningarstaði fyrir einstaklinga og hópa
- Um 12 km af malarstígum fyrir göngu, hlaup og hjólreiðar, þar af eru 6 km upplýstir
- Fjölbreytt net skógarstíga og gönguleiða
- Salernisaðstöðu og drykkjarvatn
- Fjögur bílastæði
- Fjallahjólaleiðir sem tengjast leiðunum í Hlíðarfjalli og mynda samanlagt 21,6 km leið
Kjarnaskógur að vetri
Á veturna verður Kjarnaskógur eitt stærsta skipulagða gönguskíðasvæði landsins í skóglendi. Þegar aðstæður leyfa eru þar lagðir um 20 km af gönguskíðabrautum, þar af eru 6 km upplýstir.
Einnig eru útbúin sleðasvæði við styttuna af Einari skógarverði og neðan við sólúrið. Upplýsingar um stöðu gönguskíðabrauta má finna á vef Kjarnaskógar.
Aðkoma
Frá Akureyri er ekið suður eftir vegi 823, fram hjá flugvellinum. Beygt er til hægri við skiltið „Kjarnaskógur“ og veginum fylgt upp að bílastæði. Aksturinn frá miðbæ Akureyrar tekur um fimm mínútur.
Einnig er hægt að taka strætó númer 1, 2 eða 5 frá Ráðhústorgi og fara út við Kjarnagötu/Vallatún, nálægt golfvellinum. Þaðan eru um 2 km að Kjarnaskógi.
Tengiliður
Skógræktarfélag Eyfirðinga
Sími: 462 4047
Netfang: ingi@kjarnaskogur.is
Vefsíða: www.kjarnaskogur.is
