Leita
Finnur þú það ekki? Prófaðu leitina :)

Þéttbýli

freydis-heba-7-2.jpg
Þéttbýli

Á Norðurlandi eru fjölmargir áhugaverðir bæir, stórir og smáir, þar sem mannlíf og atvinnulíf er fjölbreytt. Hver bær hefur sín sérkenni en öllum er sameiginlegt að taka vel á móti gestum. Fjölbreytt gisting, góðir veitingastaðir, blómstrandi menning og möguleikar tilútivistar og afþreyingar eru alls staðar fyrir hendi. 

Skoðunarferðir um bæina eru því bæði skemmtilegar og fræðandi.

 

Hvammstangi

Hvammstangi er stærsti þéttbýliskjarni Húnaþings vestra. Verslunarsaga staðarins nær yfir rúm 100 ár og er Verslunarminjasafnið gott dæmi um hvernig verslað var í krambúðum hér áðurfyrr.

Góð höfn er á Hvammstanga og þaðan er gerður út sjóstanga- og selaskoðunarbátur. Hvammstangi er tilvalinn áfangastaður ferðamanna og er þar mjög góð sundlaug, gott tjaldsvæði í skjólgóðum hvammi með þægilegu þjónustuhúsi og tengingum fyrir tjald- og húsvagna.

Jafnframt er á Hvammstanga gistihús, verslun, veitingastaður, bankaþjónusta, heilsugæsla, bensínstöð, bílaverkstæði og önnur nauðsynleg þjónusta.

Selasetur Íslands veitir upplýsingar um seli og Vatnsnes, auk þess er þar almenn upplýsingamiðstöð ferðamanna.

Skagaströnd

Á Skagaströnd er að finna fagra náttúru í fjölbreyttu landslagi og gróðri hvert sem litið er. Glæsileiki Spákonufells trónir yfir bænum en þar eru stikaðar gönguleiðir upp fjallið. Á toppnum upplifa göngugarpar tignarlegan kraft þessa einstaka fjalls.

Í Nesi listamiðstöð dvelja listamenn frá mörgum heimshornum, þar er jafnvel hægt að kíkja við og sjá hverju verið er að vinna að.

Spákonufellshöfði, yfirleitt þekktur sem Höfðinn, er vinsælt útivistarsvæði og hentar vel þeim sem ekki leggja í að takast á við fjallið. Þar er val um merktar gönguleiðir meðfram strandlengjunni og upplýsingaskilti um gróður og fjölbreytt fuglalífið á svæðinu.

Þeir sem heillast af þjóðsögum og ævintýrum geta fundið minnisvarða um Jón Árnason, einn mesta þjóðsögusafnara í Evrópu, sem staðsettur er við Spákonufellshöfða. Úti á Skagaheiði er að finna mörg vötn full af silungi auk gönguleiða.

Skagaströnd státar af frábærum golfvelli þaðan sem stórkostlegt útsýni er yfir Húnaflóa og yfir á Strandir. Í bænum er gott tjaldstæði með framúrskarandi aðstöðu. Á Skagaströnd er líka sundlaug og heitur pottur með útsýni yfir víðáttumikið haf.

Oft er höfnin á Skagaströnd iðandi af lífi þar sem sjómenn landa afla sínum upp úr öllum sínum litríku bátum, heimafólk og listamenn í göngutúrum í leit að innblæstri.

Skagaströnd - þar sem allir eru ávallt velkomnir.

Þórshöfn

Hjarta Þórshafnar slær í takt við sjávarföllin, þar hefur útgerð og fiskvinnsla verið aðalatvinnuvegurinn í gegnum tíðina. Því er einstaklega gaman að rölta niður að höfn og jafnvel kíkja á veitingahúsið Báran, sem meðal annars á fjölbreyttum matseðli býður upp á kúffisksúpu. Eða fara í sund í glæsilegri íþróttamiðstöð, þar sem upplýsingamiðstöðin er staðsett. Ekki má gleyma að Þórshöfn er anddyrið að ævintýraheimi Langaness. Þjónusta á Þórshöfn er mjög góð, þar er heilsugæsla, verslun, veitingastaður, íþróttahús, sundlaug, sparisjóður, bensínstöð, bílaverkstæði, gistihús o.fl. Einnig er þar tjaldsvæði með aðstöðu fyrir húsbíla. Samgöngur til Þórshafnar eru orðnar prýðilegar með nýjum vegi yfir Hófaskarð. Einnig er flogið til Þórshafnar alla virka daga.

Raufarhöfn

Á austurströnd Melrakkasléttu er Raufarhöfn, nyrsta alla þorpa á  Íslandi. Hvergi á Íslandi verður vornóttin bjartari né vetrardagurinn myrkari. Heimskautsbaugur er rétt við ströndina og á ásnum fyrir ofan þorpið er Heimskautsgerðið, stærsta útilistaverk á Íslandi sem tvinnar saman íslenska menningu, bókmenntasögu og sígild vísindi við sérstæðar náttúruaðstæður.(linkur)

Íbúafjöldi á Raufarhöfn er 190. Útgerð hefur ávallt verið undirstöðuatvinnuvegur á Raufarhöfn og á síldarárunum var hér ein mesta uppskipunarhöfn landsins og iðandi mannlíf. Nú ríkir meiri kyrrð yfir þorpinu og þar er gott að dvelja um hríð, fara í gönguferðir, veiði, siglingar og njóta miðnætursólarinnar.

Umgjörð kaupstaðarins er einstaklega falleg. Höfnin liggur í skjóli Raufarhafnarhöfða og yfir henni vakir falleg kirkja, byggð eftir teikningu Guðjóns Samúelssonar árið 1927 Melrakkaslétta er kunn fyrir hlunnindi, fiskveiðar, fjörubeit, æðarvarp, eggjatöku, og gjöful veiðivötn. Þarna er einstök náttúrufegurð á vorin og sumarkvöldum og fjölskrúðugt fuglalíf. Af Rauðanúp er stórkostlegt útsýni og návígi við fuglalífið í dröngunum Karli og Kerlingu. Nyrst á sléttunni er Hraunhafnartangi, nyrsti hluti Íslands. Þar er Þorgeirsdys sem talin er vera haugur fornhetjunnar hugprúðu, Þorgeirs Hávarssonar, en frá vígi hans í frækilegum bardaga segir í Fóstbræðrasögu

Á Raufarhöfn er öll grunnþjónusta heilsugæsla, apótek, matvöruverslun, banki, pósthús, sundlaug, heilsurækt, tjaldstæði, bifreiðaverkstæði, sjálfsali fyrir eldsneyti, hótel, gistiheimili, og kaffihús.

Á hverju ári eru haldnir menningardagar sem enda á Hrútadögum, fyrsta laugardag í október. Mikið er um að vera í þorpinu þessa daga og án efa gaman að koma og upplifa menningu íbúa á þennan hátt

Grenivík

Kauptúnið Grenivík stendur undir fjallinu Kaldbak sem er 1173 m hátt. Skemmtilegar gönguleiðir eru upp á Kaldbak, en fyrir þá sem kjósa léttari leiðir er Þengilhöfði ákjósanlegri en það er 260 m hátt fjall suður af Grenivík. Fleiri fjöll í byggðarlaginu er ögrandi að klífa svo sem Blámannshatt og Laufáshnjúk.

Þegar minnst er á Grenivík koma Fjörðurnar og Látraströnd fljótt upp í hugann. Á Látraströnd og í Fjörðum var byggð áður fyrr og eru þessar gömlu byggðir paradís göngumannsins og sífellt fleiri leggja leið sína á þetta svæði til að kynnast fjölbreyttri og fallegri náttúru og sögu forfeðra okkar sem bíður við hvert fótmál.

Byggðarlagið vekur sífellt meiri áhuga ferðamanna og ættu flestir að finna eitthvað við sitt hæfi. Hestaleiga er hjá Pólarhestum á Grýtubakka, húsdýragarður í Hléskógum, Fjörðungar sérhæfa sig í gönguferðum um Fjörður og Látraströnd og Kaldbaksferðir bjóða upp á snjótroðaraferðir upp á Kaldbak. Að auki er veiði í Fnjóská og Fjarðará í Hvalvatnsfirði.

Matvöruverslunin Jónsabúð er á Grenivík en þar er líka kaffi og veitingasala. Í Gamla prestshúsinu í Laufási er einnig veitingasala. Við grunnskólann er góð sundlaug og tjaldstæði. Í Hléskógum er bændagisting og tjaldstæði.

Það er vel þess virði að taka sér tíma til að staldra við utan hringvegarins og heimsækja byggðarlagið og njóta náttúrufegurðar og persónulegrar gestrisni heimamanna.

Akureyri

Akureyri iðar af mannlífi allan ársins hring. Í bænum búa um 20.000 manns og er hann sá langfjölmennasti utan höfuðborgarsvæðisins, miðstöð athafnalífs og þjónustu fyrir allt Norðurland.

Akureyri er menningar- og skólabær sem byggir á traustum grunni. Þar starfa tvö af stærri sjávarútvegsfyrirtæki landsins og ferðaþjónusta skipar sífellt hærri sess.

Frá Akureyri er stutt í margar helstu náttúruperlur landsins og bærinn sjálfur er vinsæll áningastaður um lengri eða skemmri tíma.

Hér fyrir neðan má sjá lista yfir fjölmarga hluti sem mælt er með að gestir skoði þegar þeir dvelja á Akureyri:

  • Lystigarðurinn - u.þ.b. 400 íslenskar plöntur auk rúmlega 7500 erlendra tegunda
  • Listasafnið og Listagilið
  • Sundlaug Akureyrar
  • Húni II - eikarbátur frá 1963 sem er staðsettur við Torfunesbryggju
  • Veitingahús sem bjóða upp á mat úr héraði
  • Kjarnaskógur
  • Innbærinn - söfn, kirkja og byggingar
  • Jaðarsvöllur - nyrsti 18 holu golfvöllur í heimi Glerárgil
  • Hrísey - perla Eyjafjarðar
  • Akureyrarvaka - uppskeruhátíð Listasumars sem haldin er í lok ágúst ár hvert
  • Bjór frá Víking og Kalda - brugghús í héraði
  • Brynjuís - í uppáhaldi heimamanna
  • Akureyrarkirkja
  • Hlíðarfjall
Grímsey

Grímsey er græn, grösug og einstaklega gjöful eyja. Frægust er Grímsey trúlega í hugum ferðamanna fyrir heimskautsbauginn og kemur fólk gjarnan langa leið, til þess eins að stíga norður fyrir baug.

Eyjan er 5,3 km2 að stærð. Hæst er hún 105 metrar og fjarlægð frá "Íslandi" er 41 km.

Mannlífið er kröftugt og bjart og eru Grímseyingar mikilir gleðimenn sem vinna og skemmta sér af alhug. Góð sundlaug var vígð árið 1989. Eyjabúar versla í versluninni Búðinni, sem er einkarekin og er þar gott vöruúrval. Einnig eru tvö gistiheimili í Eyjunni og annað er opið allan ársins hring.

Ferjan Sæfari siglir frá Dalvík til Grímseyjar 3 daga í viku allt árið. Reglubundið flug með Flugfélagi Íslands er einnig þangað, 3 sinnum í viku yfir veturinn en sjö daga á sumrin.

Húsavík

Húsavík er elsti bær á Íslandi ásamt því að vera stærsti bærinn í Þingeyjarsýslu og þjónustar hann nærlæg svæði. Bærinn er kallaður „höfuðborg hvalanna“ vegna þess að hann er þekktur fyrir hvalaskoðun á Skjálfandaflóa. Hægt er að finna 23 tegundir hvala þar á meðal steypireyð í flóanum og einnig er hægt að sjá stórar varpstöðvar lunda.

Á Hvalasafninu má sjá raunstærð hvala þar sem meðal annars er 22 metra löng beinagrind af steypireyð til sýnis þar. Það eru nokkur hvalaskoðunarfyrirtæki á Húsavík sem sigla seglum þöndum í leit að þessum stórkostlegu dýrum á flóanum, en slíkt er reynsla sem engin ætti að missa af og gleymist aldrei. Heimsókn í Safnahúsið svíkur heldur engan en þar er sjóminjasýning, sýning um mannlíf og náttúru í 100 ár, skjalasafn, myndasafn og sýningarsalur fyrir list þar sem eru rúllandi sýningar. Menningarlíf í þorpinu og nærsveitum er blómlegt og áhugamannaleikfélagið á staðnum er meðal þeirra bestu á landinu. Það er einnig talsvert af kórum og hljómsveitum á staðnum.

Á Húsavík má finna allskonar gistiaðstöðu og veitingastaði. Einnig er þar bakarí, bruggverksmiðja og bar, tjaldsvæði, sundlaug, golfvöllur, skíðasvæði og góðar gönguleiðir. Nýlega opnuðu sjóböð á svæðinu sem bjóða upp á bað í heitu sjóvatni með ótrúlega fallegu útsýni yfir Skjálfanda. Flugvöllur er rétt fyrir utan bæinn og því auðvelt að komast á staðinn. 

Sauðárkrókur

Sauðárkrókur stendur við botn Skagafjarðar að suðvestan. Á Sauðárkróki er fjölbreytt þjónusta; sýningar, söfn, skemmtistaðir, verslanir, veitingar, gisting, sjúkrahús, verkstæði, íþróttavöllur, strandblakvöllur, sundlaug o.fl.

Á Aðalgötunni er verslun Haraldar Júlíussonar, hún hefur starfað óslitið frá árinu 1919. Einnig er Minjahúsið við Aðalgötuna en þar eru m.a. til sýnis fjögur lítil verkstæði í anda liðinna tíma, einnig er ísbjörn til sýnis í Minjahúsinu og þar er staðsett upplýsingamiðstöð.

Brekkurnar fyrir ofan bæinn kallast Nafir og eru fornir sjávarkambar, á Nöfunum er útsýnisskífa þar sem hægt er að njóta þess að horfa yfir fjörðinn. Einnig er golfvöllur upp á Nöfum.

Sauðárkrókur er einn öflugasti byggðarkjarni landsbyggðarinnar þar sem saman fer öflug útgerð, úrvinnsla afurða af stóru landbúnaðarsvæði og þjónusta sem jafnast á við það besta sem býðst á landsbyggðinni.

Austan við Sauðárkrók er Borgarsandur tæplega fjögurra kílómetra löng svört sandfjara. Litlu sunnar við Áshildarholtsvatn er fjölskrúðugt fuglalíf en þar má finna upplýsingaskilti um fugla. Mikið fuglalíf er við ósa Héraðsvatna og á Miklavatni og Áshildarholtsvatni rétt sunnan Sauðárkróks.

Blönduós

Blönduós er fjölmennasti þéttbýlisstaðurinn við Húnaflóa og liggur við þjóðveg 1 og því mikill fjöldi bíla sem þar fer í gegn ár hvert svo fjölbreytta þjónustu má finna við þjóðveginn. Í gegnum bæinn rennur ein helsta jökulá landsins, Blanda og í henni miðri er eyjan Hrútey, ein af náttúruperlum svæðisins. Eyjan er friðlýst og lokuð allri umferð vegna fuglavarps frá  20.apríl til 20.júní en á öðrum tímum er hægt að ganga um brú yfir í eyjuna og eru þar gönguleiðir. Gangan meðfram Blöndu niður að ósnum er sérlega rómantísk með útsýni yfir hafið að Strandafjöllum.

Auk náttúruskoðunar er ýmsa aðra afþreyingu að finna á svæðinu, stórkostlega vel útbúin sundlaug er á Blönduósi þar sem allt er til staðar og himneskt er að njóta kaffibolla í heita pottinum á meðan börnin leika sér í vaðlauginni eða renna sér í brautunum. Í nágrenni við sundlaugina er stór ærslabelgur, staðsettur á lóð Blönduskóla en auk hans er að finna þar kastala, sparkvöll og hjólabrettapalla. Mikið er um veiði í ám og vötnum í nágrenni Blönduóss auk þess er þar golfvöllur.

Heimilisiðnaðarsafnið er einn af helstu seglum svæðisins en þar er að finna hluta af atvinnusögu þjóðarinnar og þar má sjá hvernig sjálfsþurftabúskapur og heimilisiðja mæta nútíma viðskiptabúskap á seinni hluta nítjándu aldar og fram á þá tuttugustu. Í gamla Kvennaskólanum á Blönduósi er Textílmiðstöð Íslands en Blönduósbær er mikill textílbær.

Gamli bærinn á Blönduósi stendur við opið haf en þar standa ennþá mörg af þeim upprunalegu húsum sem byggð voru þegar sá hluti bæjarins var í blóma á árum áður. Upplýsingamiðstöð ferðamála í Austur Húnavatnssýslu er staðsett í gamla bænum. Einnig má þar finna Hillebrandshús, eitt elsta timburhús á Íslandi, reist 1877 á Blönduósi en áður hafði það staðið á Skagaströnd í 130 ár.

Fjölbreyttir gistimöguleikar eru á svæðinu, hótel, gistiheimili, sumarhús með heitum pottum og sauna auk vel búnu tjaldsvæði sem liggur við Blöndu. Veitingar fást á grillstöðum, kaffi- og veitingahúsum.

Á Blönduósi fara fram fjölbreyttir viðburðir eins og Prjónagleði, Smábæjarleikarnir, þar sem ungir krakkar keppa í fótbolta og bæjarhátíðin Húnavaka. 

Bakkafjörður

Á Bakkafirði snýst lífið að mestu um fiskinn í sjónum og réttinn til að hafa lífsviðurværi sitt af veiðum á honum! Bakkafjörður býður upp á ótalmarga útivistarmöguleika, gönguferðir, fuglaskoðun, fjöruferðir og fleira. Gaman er að skoða gömlu höfnina og lífið í kringum þá nýju sem er skammt innan við þorpið. Skemmtileg gönguleið liggur út að Steintúni og áfram út að vitanum á Digranesi. Gönguslóð er einnig með Viðvíkurbjörgunum í Viðvík og þaðan yfir að Álftavatni og til Bakkafjarðar. Kyrrð og friður, fuglalíf og náttúrufegurð einkenna svæðið. Spriklandi fiskur er í ám og vötnum sem hægt er að fá að veiða. Sundlaug er í Selárdal í 30 km fjarlægð frá Bakkafirði, laugin er í eigu Vopnfirðinga og er magnað útsýni til fjalla þaðan og á laxveiðitímanum er hægt að fylgjast með laxveiðimönnum glíma við laxinn í Selá sem rennur rétt neðan við laugina í Selárdal.

Kópasker

Kópasker er vinalegt sjávarþorp við austanverðan Öxarfjörð sem rekur sögu sína aftur til ársins 1880, en þá varð það fyrst löggildur verslunarstaður og tók þá að byggjast upp smátt og smátt. Þorpið sækir nafn sitt til skers er fyrrum gekk út í sjóinn og en á því stendur nú hafnargarður.

Kópasker er vinalegt sjávarþorp við austanverðan Öxarfjörð sem rekur sögu sína aftur til ársins 1880, en þá varð það fyrst löggildur verslunarstaður og tók þá að byggjast upp smátt og smátt. Þorpið sækir nafn sitt til skers er fyrrum gekk út í sjóinn og en á því stendur nú hafnargarður.

Meginatvinnuvegur þorpsins er er þjónusta við íbúa og nágrannasveitum og ferðaþjónusta. Stærsti atvinnuveitandi er sláturhúsið og kjötvinnslan Fjallalamb hf. Aðeins er um útgerð á Kópaskeri sem er þó aðeins bundin við nokkra smábáta.

Á Kópaskeri er ýmis grunnþjónusta í boði, svo sem matvöruverslun, verkstæði, heilsugæslustöð, apótek, banki, póstur, heilsurækt, sjálfsali fyrir bensín, veitingasala og nokkrir gististaðir ásamt tjaldsvæði.

Ýmislegt er vert að gera og sjá á Kópaskeri. Má þá nefna að þar er í kring er afar fjölbreytt fuglalíf og áhugaverðar gönguleiðir. En þá er einnig á staðnum Byggðasafn Norður-Þingeyinga og Skjálftasetrið sem veitir innsýn í svo kölluðum Kópaskers skjálfta sem átti sér stað árið 1976. En þá varð mikið tjón í þorpinu, einkum á húsum og öðrum mannvirkjum.

Ýmislegt er vert að gera og sjá á Kópaskeri. Á Snartarstöðum við Kópasker er einstök sýning á munum úr byggðarsafni N-Þingeyinga.  Þar er m.a. að finna mikið úrval hannyrða af ýmsum toga og merkilegt bókasafn. Í skólahúsinu er Skjálftasetrið, sem greinir í máli og myndum frá skjálftanum við Kópasker 1976, orskökum hans og áhrifum á mannvirki, landslag og mannlíf. Við Kópasker eru jafnframt áhugaverðar gönguleiðir og afar fjölbreytt fuglalíf.

Á hverju ári eru haldin Sólstöðuhátíð á Kópaskeri, í júní. Mikið er um að vera í þorpinu þessa helgi og gaman er að koma og upplifa menningu íbúa á þennan hátt.

Laugar

Laugar í Reykjadal er þéttbýliskjarni sem hefur byggst upp á jarðhitasvæði. Þar er skólasetrið Laugar í Reykjadal, þar sem bæði eru grunnskóli og framhaldsskóli.

Á Laugum er miðstöð stjórnsýslu í Þingeyjarsveit og ýmis önnur þjónusta í boði, svo sem banki, verslun og veitingastaður. Á sumrin er þar starfrækt hótel, og auk þess bjóða fleiri aðilar upp á gistingu. Á Laugum er einnig sundlaug og frábær aðstaða til íþróttaiðkunar.

Svalbarðseyri

Svalbarðseyri er þorp á Svalbarðsströnd við austanverðan Eyjafjörð. Svalbarðsströnd er blómlegt landbúnaðarhérað og á Svalbarseyri er löng hefð fyrir öflugri þjónustu og starfsemi tengdri landbúnaði. Þar er einnig höfn fyrir smábáta. Ferðaþjónusta hefur verið í örum vexti á svæðinu og er iðnaður og þjónustustarfsemi nú höfuðatvinnuvegurinn.

Eyjafjarðarsveit

Eyjafjarðarsveit er ein blómlegasta sveit Íslands og í næsta nágrenni við Akureyri. Um sveitina liðast hin stórbrotna Eyjafjarðará sem setur fallegan svip á umhverfið og ber mér sér næringu til jarðarinnar sem gerir sveitina svo öfluga til búskapar. Til sveita má sjá kýr, hesta og kindur ásamt fjölda annarra spendýra og við óshólma Eyjafjarðarár má bera augum fjölbreytta flóru fugla sem verpa þar og dafna á sumrin.

Fjölmargar gönguleiðir má finna í Eyjafjarðarsveit og má þar nefna útivistastíginn milli Hrafnagils og Akureyrar þar sem áhugasamir geta hjólað, gengið eða hlaupið í stórbrotnu og rómantísku umhverfinu við Eyjafjarðará. Við Akureyrarflugvöll eru einnig hægt að taka fallega göngu um óshólma Eyjafjarðarár allan ársins hring. Framar í dalnum er hægt að sækja fjöllin sem rísa tignarlega kringum dalinn og má þar helst nefna Kerlingu sem gnæfir yfir þeim öllum og er hæsta fjall Íslands beint úr byggð.

Í Eyjafjarðarsveit er þéttbýliskjarninn Hrafnagil með fjölskylduvænni sundlaug og leiktækjum sem umvefja umhverfi hennar ásamt glæsilegu og fullbúnu tjaldsvæði. Þar má einnig finna Jólahúsið sem sett hefur svip sinn á ferðaþjónustu á norðurlandi um árabil. Í sveitinni má bera augum sex fallegar kirkjur og hið frábæra Smámunasafn Sverris Hermannssonar sem hefur að geyma skemmtilegan karakter og fjölda muna af allri heimsins gerð.

Fjölbreytt úrval gistimöguleika, veitinga og afþreyingar er í Eyjafjarðarsveit og geta gestir svæðisins notið matar úr héraði, dægrastyttingar og gistingar í kyrrð og nálægt við náttúru og persónuleika sveitarinnar sem upplifa má á Handverkshátíð Eyjafjarðarsveitar, stærstu handverkshátíðar Íslands.

Dalvík

Fyrir þá sem vilja njóta náttúrunnar frá fyrstu hendi er Dalvík í Dalvíkurbyggð tilvalinn áfangastaður en sveitarfélagið liggur við náttúruparadísina Tröllaskaga auk þess að hafa frábært aðgengi að sjó.

Í Dalvíkurbyggð er fjölmargar gönguleiðir að finna, styttri og lengri. Af lengri gönguleiðum má nefna gömlu þjóðleiðina yfir Heljardalsheiði milli Svarfaðardals og Hóla í Hjaltadal og einnig liggja þrjár gamlar þjóðleiðir yfir til Ólafsfjarðar, Reykjaheiði, Grímubrekkur og Drangar, sem gaman er að ganga.

Frá Dalvíkurhöfn siglir ferjan Sæfari milli Dalvíkur og Grímseyjar og á Dalvík má einnig finna glæsilega sundlaug, byggðasafnið Hvol, einstakt skíðasvæði, 9 holu golfvöll, sjóstangveiði og hvalaskoðun, hestaferðir og margt, margt fleira.

Það er tilvalið að skella sér á Dalvík og upplifa kyrrðina, öryggið og dásamlegt útsýnið.

Láttu sjá þig í Dalvíkurbyggð og þú munt ekki sjá eftir því!

Hjalteyri

Hjalteyri er smáþorp á vesturströnd Eyjafjarðar. Þar var ein af aðalstöðvum síldveiða snemma á 20. öldinni. Í gömlu síldarverksmiðjunni fer nú fram mikil uppbygging þar eru haldnar listsýningar, þar er köfunarþjónusta, sútun, hákarlaverkun auk þess sem hópur áhugamanna um gamla bíla hefur haslað sér völl á Hjalteyri.

Mývatn

Reykjahlíð er byggðakjarni við Mývatn, sem er eitt helsta ferðamannasvæði norðurlands. Þar er í boði ýmis þjónusta svo sem verslun, banki, pósthús, heilsugæslustöð og skóli. Í Mývatnssveit er margs konar gistiaðstaða umhverfis vatnið ásamt fjölmörgum góðum veitinga- og kaffihúsum. Fjölbreytt afþreying er í boði á svæðinu, allan ársins hring.

Fjölskrúðugt fuglalíf er á svæðinu og full ástæða er til að staldra við í nýja Fuglasafninu í Neslöndum. Skammt austur af Reykjahlíð eru Jarðböðin við Mývatn þar sem ferðalangar njóta þess að slaka á í heitu jarðvatninu. Í Mývatnssveit eru margar merktar gönguleiðir.

Mývatn er um 32 km2 að stærð. Það er mjög vogskorið og í því eru um 50 eyjar og hólmar. Meðaldýpi vatnsins er 2,5 m og mesta náttúrulega dýpi aðeins um 4 m. Lífríki Mývatns er einstætt og er nafn vatnsins dregið af þeim aragrúa mýs sem þar er. Talið að þar haldi sig fleiri andategundir en á nokkrum öðrum stað á jörðinni. Í Mývatnssveit er fjölbreytni í náttúrufari mikil og landslag sérstætt, enda mótað af miklum eldsumbrotum.

Hauganes

Hauganes er hluti af Árskógsströnd og syðsti þéttbýliskjarni Dalvíkurbyggðar.

Á Hauganesi búa um 140 manns og snýst lífið þar líkt og á Árskógssandi öðru fremur um fiskveiðar og fiskvinnslu. Á Hauganesi er hægt að njóta bæði sveitasælunnar og nálægð við aðra þéttbýliskjarna.

Sjópottarnir í Sandvíkurfjöru eru orðnir vinsælir meðal gesta sem heimsækja Hauganes, þar sem upplifa má kyrrð og njóta dásamlegs útsýnis.

Láttu sjá þig í Dalvíkurbyggð og þú munt ekki sjá eftir því.
Það ætti enginn að láta heimsókn á Hauganes fram hjá sér fara.

Árskógssandur

Árskógssandur í Dalvíkurbyggð er þéttbýliskjarni sem stendur niður við sjó og tengir saman land og eyju en skipið Sævar siglir milli Árskógssandar og Hríseyjar.

Nálægð við náttúruna er mikil og mikið er um gönguleiðir við allra hæfi í nágrenninu. Það er tilvalið að skella sér á Árskógssand og upplifa kyrrðina, öryggið og dásamlegt útsýnið.

Láttu sjá þig í Dalvíkurbyggð og þú munt ekki sjá eftir því.
Það ætti enginn að láta heimsókn á Árskógssand fram hjá sér fara.

Hrísey

Náttúruperlan Hrísey liggur um miðbik Eyjafjarðar. Þar er lítið sjávarþorp sem býður upp á ýmislegt sem ferðafólki kemur til góða, t.d.sundlaug, lítið gistiheimili, veitingahús, tjaldsvæði, kaffihús og verslun.

Gönguleiðir liggja frá þorpinu víðs vegar um eyjuna sem þekkt er fyrir fjölbreytt fuglalíf.

Skemmtileg dagskrá fyrir ferðafólk gæti t.d. verið fólgin í einhverju af því sem hér segir: Skoðunarferð á dráttarvél um eyna, með heimsókn í hákarlasafnið sem hefur að geyma ríkulegan fróðleik um hákarlaútgerð fyrri tíma og annað sem tengist sögu byggðarlagsins.

Til að komast til Hríseyjar, er stefnan tekin á Dalvík og beygt við vegamótin að Árskógssandi, áður en til Dalvíkur er komið. Hríseyjarferjan heldur uppi áætlunarferðum frá Árskógssandi og tekur siglingin út í eyju um 15 mínútur.

Ólafsfjörður

Mikil náttúrufegurð er í Ólafsfirði og margar góðar gönguleiðir eru á svæðinu.  Ólafsfjörður hefur síðustu ár orðið sífellt vinsælli áningarstaður ferðalanga, enda er hann rómaður fyrir fegurð, kyrrð og ró.

Á veturna er Ólafsfjörður sannkölluð vetrar- og skíðaparadís og draumur útivistarmannsins og á sumrin eru það fjöllin, sjórinn, Ólafsfjarðarvatn og svört sandfjaran sem heilla.

Í stórbrotnu landslagi fjarðarins má finna fjölbreyttar gönguleiðir um fjöll og dali og njóta einstaks útsýnis í kyrrð og ró.  Yfir sumartímann er hægt að horfa á miðnætursólina dansa á sjóndeildarhringnum áður en hún rís að nýju og á vetrum eru norðurljósin stórfengleg.

Afþreyingarmöguleikar eru nánast ótæmandi.  Í Ólafsfirði er 9 holu golfvöllur, sundlaug, glæsilegt náttúrgripasafn, fjöldi  gallería, tvo veitingahús, hótel, gistiheimili og verslun.

Siglufjörður

Siglufjörður býr að stórbrotinni náttúrufegurð, þar sem möguleikar á sviði útivistar og tómstunda eru hreint óþrjótandi. Náttúran er ávallt innan seilingar, hvort heldur haldið er í gönguferðir, skellt sér á skíði eða veitt í vötnum, ám eða sjó, ásamt fjölþættum gönguleiðum um fjöll og dali. Við slíkar aðstæður hefur nær ósnortið og friðsælt náttúrufar Héðinsfjarðarins notið mikillar hylli hjá ferðafólki.

Á Siglufirði er nægur snjór í fjöllunum og allsstaðar hægt að finna tækifæri og aðstöðu til útiveru. Á veturna er staðurinn skíðaparadís og draumur útivistarmannsins. Hægt er að fara á svigskíði, fjallaskíði og gönguskíði eða þeytast um á snjósleða.

Skíðasvæðið í Skarðsdal má tvímælalaust telja með bestu skíðasvæðum landsins. Þar er oftast svo mikill snjór að hægt er að skíða langt fram á vor. Á svæðinu eru nú þrjár lyftur, tvær samfelldar: diskalyfta og T-lyfta, samtals um það bil 1.500 metrar að lengd. Þriðja og efsta lyftan er 530 metra löng með um 180 metra fallhæð. Efri endi lyftunnar er í rúmlega 650 metra hæð yfir sjó.

Á Siglufirði er blómlegt menningarlíf. Fjöldi veitingahúsa, með fjölbreytta matseðla er að finna og gistimöguleikar miklir. Einnig eru fjölmörg gallerí og vinnustofur, söfn og setur. En þar er helst að nefna Síldarminjasafnið og Þjóðlagasetur Sr. Bjarna Þorsteinssonar og Ljóðasetur Íslands.

Á Siglufirði er 25 metra innisundlaug og heitur pottur (úti). Á Siglufirði er 9 holu golfvöllur og nægt framboð af afþreyingu.

Fastar árlegar bæjarhátíðir eru Páskafjör á skíðasvæðinu, Þjóðlagahátíð, Trilludagar, Ljóðahátíð og Síldaævintýrið.

Hofsós

Hofsós er lítið kauptún við austanverðan Skagafjörð. Fyrrum aðalverslunarstaður héraðsins og einn af elstu verslunarstöðum landsins sem enn stendur.

Á Hofsósi er gamalt bjálkahús, Pakkhúsið, vörugeymsla frá tímum einokunar. Þá er þar einnig í nýuppgerðu gömlu húsi annað safn sem er vel þess virði að skoða- Vesturfarasetrið sem segir frá flutningi hluta þjóðarinnar til Vesturheims.

Veitingastofan Sólvík býður uppá veitingar í þægilegu umhverfi, tjaldsvæði er við grunnskólann og gistiheimili. Ný og glæsileg sundlaug var tekin í notkun á Hofsósi 27.mars 2010. Nýja sundlaugin og umhverfi hennar er einkar glæsilegt. Lauginni var valinn staður niður á sjávarbakka, sunnarlega í þorpinu, ofan við svonefnda Staðarbjargarvík. Laugin er þannig frágengin að þegar synt er frá suðri til norðurs rennur vatnsflötur laugarinnar saman við hafflötinn neðan hennar með beina stefnu á Drangey.

Á Jónsmessu er haldin Jónsmessuhátíð á Hofsósi

Hólar

Hólar eru einn sögufrægasti staður Íslands og biskupssetur um aldir. Kirkja hefur staðið á Hólum frá 11. öld, en núverandi kirkja var reist 1763. Hún er byggð úr rauðum sandsteini úr fjallinu Hólabyrðu og er elsta steinkirkja á Íslandi.

Háskólinn á Hólum hefur stækkað ört á síðustu árum og hefur fjöldi nemendagarða verið byggður. Íbúar Hóla eru yfir tvö hundruð talsins að vetri til. Skólinn sérhæfir sig í ferðamálafræðum, hrossarækt og reiðmennsku, auk fiskeldis og fiskalíffræði.

Fornleifauppgröftur hefur farið fram á Hólum síðustu ár og hafa yfir 40 þúsund munir fundist. Úrval forngripa er til sýnis í gamla skólahúsinu. Um skóginn hlykkjast spennandi göngustígar sem leiða mann inn í undraheima lifandi náttúru þessa forna sögustaðar.

Á Hólahátíð, sem er jafnan um miðjan ágúst eru margskonar viðburðir á vegum kirkjunnar s.s. Pílagrímagöngur, helgihald og aðrir menningarviðburðir.

Laufskálarétt í Hjaltadal er ein vinsælasta stóðrétt landsins en þangað mæta árlega allt að þrjú þúsund gestir og er af mörgum talin drottning stóðréttanna.

Varmahlíð

Varmahlíð er einn vinsælasti áningarstaður ferðamanna við þjóðveg nr. 1; byggðakjarni með fjölbreytt framboð þjónustu. Þar eru m.a. söluskáli, bensínstöð, matvöruverslun og veitingaþjónusta.

Við hlið verslunarmiðstöðvar KS er Upplýsingamiðstöð ferðamanna. Þar kynnir handverksfélagið Alþýðulist skagfirskt handverk. Í Varmahlíð er gott íþróttahús, barnvæn sundlaug og sparkvöllur.

Gistimöguleikar í Varmahlíð og nágrenni eru fjölbreyttir en hægt að fá gistingu í orlofshúsum, bændagistingu, tjaldsvæði og á hóteli.

Menningarhúsið Miðgarður er staðsett í Varmahlíð, þar sem boðið er upp á ýmsar skemmtanir árið um kring. Á góðviðrisdegi er gaman að ganga um í skógræktinni á Reykjarhólnum, á göngustígum sem liggja m.a. upp að útsýnisskífu efst á hólnum, þaðan sem útsýni er einstakt yfir miðhéraðið.

Laugarbakki

Þorpið Laugarbakki er austanmegin Miðfjarðarár, í Húnaþingi vestra, rétt við hringveginn. Fyrsta húsið á Laugarbakka var byggt 1933. Árið 1970 var reistur stór heimavistarskóli í þorpinu, Hótel Laugarbakki er nýtt hótel sem er opið allt árið sem bíður upp á nútíma þægindi og veislusal fyrir allt að 400 manns.

Á Laugarbakka er verslun, sundlaug (sem breytt hefur verið í notalega heita potta) og félagsheimili, sem að sumarlagi er vinsæll vettvangur fyrir fjölskyldusamkomur. Frá Laugarbakka til Hvammstanga eru aðeins 7 km.

Norðurland

Þéttbýliskjarnar

Á Norðurlandi eru fjölmargir áhugaverðir bæir, stórir og smáir, þar sem mannlíf og atvinnulíf er fjölbreytt. Hver bær hefur sín sérkenni en öllum er sameiginlegt að taka vel á móti gestum. Fjölbreytt gisting, góðir veitingastaðir, blómstrandi menning og möguleikar til útivistar og afþreyingar eru alls staðar fyrir hendi. 

Skoðunarferðir um bæina eru því bæði skemmtilegar og fræðandi.

Skoða meira

Map Akureyri Hrafnagil Grímsey Raufarhöfn Kópasker Þórshöfn Bakkafjörður Húsavík Mývatn Laugar Svalbarðseyri Grenivík Hjalteyri Hauganes Árskógssandur Dalvík Hrísey Ólafsfjörður Siglufjörður Hofsós Hólar Varmahlíð Sauðárkrókur Skagaströnd Blöndós Hvammstangi Laugarbakki Borðeyri