Raufarhöfn

Á austurströnd Melrakkasléttu er Raufarhöfn, nyrsta þorp á Íslandi. Hvergi á Íslandi verður vornóttin bjartari né vetrardagurinn myrkari. Heimskautsbaugur er rétt við ströndina og á ásnum fyrir ofan þorpið er Heimskautsgerðið, stærsta útilistaverk á Íslandi sem tvinnar saman íslenska menningu, bókmenntasögu og sígild vísindi við sérstæðar náttúruaðstæður.

Útgerð hefur ávallt verið undirstöðuatvinnuvegur á Raufarhöfn og á síldarárunum var hér ein mesta uppskipunarhöfn landsins og iðandi mannlíf. Nú ríkir meiri kyrrð yfir þorpinu og þar er gott að dvelja um hríð, fara í gönguferðir, veiði og siglingar og njóta miðnætursólarinnar.

Umgjörð þorpsins er einstaklega falleg. Höfnin liggur í skjóli Raufarhafnarhöfða og yfir henni vakir falleg kirkja, byggð eftir teikningu Guðjóns Samúelssonar árið 1927. Melrakkaslétta er kunn fyrir hlunnindi, fiskveiðar, fjörubeit, æðarvarp, eggjatöku og gjöful veiðivötn. Þar er einstök náttúrufegurð á vorin og sumarkvöldum og fjölskrúðugt fuglalíf. Af Rauðanúpi er stórkostlegt útsýni og návígi við fuglalífið í dröngunum Karli og Kerlingu.

Nyrst á sléttunni er Hraunhafnartangi, nyrsti hluti Íslands. Þar er Þorgeirsdys sem talin er vera haugur fornhetjunnar hugprúðu, Þorgeirs Hávarssonar, en frá vígi hans í frækilegum bardaga segir í Fóstbræðrasögu.

Á Raufarhöfn og í nágrenni eru fjölbreyttir möguleikar til útivistar og gönguferða. Meðal annars er skemmtilegt að ganga um Raufarhafnarhöfða, sannkallað leyndarmál í bakgarði þorpsins, þar sem fallegt útsýni er yfir þorpið, höfnina og hafið. Fleiri fallegar gönguleiðir er að finna bæði í og við Raufarhöfn og auðvelt er að njóta þar kyrrðarinnar og nálægðarinnar við náttúruna.

Á Raufarhöfn er öll helsta grunnþjónusta, þar á meðal heilsugæsla, apótek, matvöruverslun, banki, sundlaug, heilsurækt, tjaldsvæði, bifreiðaverkstæði, sjálfsali fyrir eldsneyti, hótel, gistiheimili og kaffihús.

Á hverju hausti eru Menningardagar haldnir á Raufarhöfn. Þeir hefjast fyrstu helgina í október og standa yfir í um tíu daga. Fjölbreytt dagskrá er í boði víðs vegar um þorpið og Menningardagarnir eru skemmtilegt tækifæri fyrir bæði heimafólk og gesti til að koma saman og upplifa mannlíf og menningu Raufarhafnar.