Á þessu svæði er skemmtilegt að aka fram Víðidal og skoða Kolugljúfur. Við bæinn Kolugil rennur Víðidalsáin friðsæl niður í þetta stórbrotna gljúfur og þar eru fossar sem kenndir eru við tröllkonuna Kolu og heita Kolufossar. Það er afar áhrifamikið að ganga út á útsýnispallinn við gljúfrið og sjá hina friðsælu á steypast fram í svo mikilfenglegum fossum. Víðidalurinn er blómleg sveit sem gaman er að aka um í rólegheitunum. Á bænum Stóru-Ásgeirssá er starfrækt hestaleiga og þar er hægt að koma heim á bæ og sjá húsdýrin á bænum.
Úr Víðidal er haldið áfram þjóðveg 1 til austurs. Við Þrístapa hefur verið komið upp vönduðum áfangastað, þar sem sögunni af síðustu aftökunni á Íslandi er gerð skil í gegnum miðlun af ýmsum toga. Það er stutt gönguleið að staðnum þar sem Agnes og Friðrik voru hálshöggvin árið 1830 og meðfram henni eru upplýsingaskilti sem segja söguna, ásamt útilistaverkum. Einnig er hljóðleiðsögn í boði sem hægt er að nálgast með því að skanna QR kóða.
Nú er ekki úr vegi að keyra að Þingeyrum og skoða hina fallegu Þingeyrakirkju sem er byggð úr steini og var vígð árið 1877. Þingeyrar er merkilegur staður því þar var fyrsta munkaklaustur Íslands stofnað árið 1133 og mikið menningarstarf fór þar fram um aldir.
Vatnsdalshólar eru meðal þriggja náttúrufyrirbæra á Íslandi sem eru sögð óteljandi. Hólarnir eru einkennilegir ásýndum og margbreytilegir að lit og lögun. Talið er að þeir hafi orðið til við jarðskrið úr Vatnsdalsfjalli fyrir um 10.000 árum síðan.
Skemmtilegt er að keyra hring inn í Vatnsdalinn og meðfram hinni vinsælu laxveiðiá, Vatnsdalsá. Fyrir miðjum dal er alldjúp, sérkennileg smátjörn sem nefnist Kattarauga, á henni eru tvær fljótandi eyjar og er hún friðlýst náttúruvætti. Gistiþjónusta er í boði á nokkrum bæjum í Vatnsdal og nágrenni hans og um að gera að taka sér góðan tíma í að skoða þetta fallega landsvæði sem er svo ríkt af sögu og menningu.
Þegar komið er aftur inná þjóðveginn er ferðinni haldið áleiðis til Blönduóss.
Á Blönduósi er að finna ýmsa afþreyingu sem hentar vel fyrir alla fjölskylduna. Stórkostleg sundlaug, útileiksvæði, veiði í ám og vötnum, ganga um gamla bæinn, leika í fjörunni, fara í göngu útí Hrútey og margt fleira. Heimilisiðnaðarsafnið er einn af helstu seglum svæðisins en þar er að finna hluta af atvinnusögu þjóðarinnar.
Hægt er að gista á Blönduósi eða halda aðeins áfram og enda á Skagaströnd um kvöldið. Þar er tilvalið að taka miðnætursólargöngu um Spákonufellshöfða sem hinn fullkomna endi á deginum.
Gistiheimili og hótel eru á Blönduósi og Skagaströnd, auk veitingastaða.
