Haustfríið á Norðurlandi

Haustfríið er kjörið tilefni til að pakka í tösku, taka sundfötin með og skella sér norður með fjölskyldunni. Hér má auðveldlega láta daginn líða við leik og útiveru, skella sér í sund og setjast síðan niður í bakaríi eða á kaffihúsi. Hér höfum við tekið saman nokkrar hugmyndir fyrir fjölskyldur sem vilja gera sér dagamun á Norðurlandi í haustfríinu.

21.10.2026

Á Norðurlandi er fjölbreytt afþreying fyrir alla fjölskylduna og auðvelt að finna eitthvað við hæfi í haustfríinu. Hvort sem planið er að njóta útiveru, prófa nýja sundlaug eða heimsækja skemmtilegt safn eru valmöguleikarnir margir. Hér eru nokkrar hugmyndir fyrir frídagana fyrir norðan.

Útivera og leikir

Fjöruferð, göngutúr eða heimsókn á nýtt leiksvæði er skemmtileg viðbót við haustfríið. Á Norðurlandi eru fjölmörg útivistarsvæði með göngu- og hjólastígum, skjólsælum rjóðrum og aðstöðu til að setjast niður með nesti. Í fjörunni má leita að skeljum og litríkum steinum, skoða rekavið og sjá hvað sjórinn hefur skilið eftir. Í Kjarnaskógi á Akureyri eru skemmtileg leiksvæði og ratleikurinn „Úti er ævintýri“, sem byggir á persónum úr barnabókum og gefur gönguferðinni nýjan tilgang. Einnig er gaman að rölta um bæi og þorp, skoða hafnarsvæðin og finna nýja viðkomustaði á leiðinni. Hér má skoða útivistarsvæði á Norðurlandi
Sundlaugar og böð

Sundfötin eru ómissandi í ferðalagið enda fjölbreytt úrval sundlauga og baðstaða á Norðurlandi. Í mörgum sundlaugum eru rennibrautir, barnalaugar og leiktæki sem halda yngri gestunum uppteknum, ásamt heitum pottum þar sem gott er að láta líða úr sér eftir útiveruna. Hér má skoða sundlaugar á Norðurlandi.

Einnig má gera sér dagamun með heimsókn í Skógarböðin við Akureyri, Sjóböðin á Húsavík, Jarðböðin við Mývatn eða Fjöruböðin á Hauganesi. Þar má njóta heita vatnsins og útsýnisins og eiga notalega stund saman. Hér má skoða böðin á Norðurlandi
Söfn og sýningar

Það er tilvalið að nýta haustfríið til að heimsækja söfn og sýningar á Norðurlandi. Á Flugsafni Íslands við Akureyrarflugvöll má skoða flugvélar af ýmsum stærðum og gerðum og kíkja inn í nokkrar þeirra. Á Hvalasafninu á Húsavík má sjá beinagrindur hvala, þar á meðal steypireyðar, en á Selasetrinu á Hvammstanga má kynnast lífi og háttum sela við Íslandsstrendur.

Fyrir þau sem vilja kynna sér sögu og mannlíf svæðisins er gaman að koma við á Minjasafninu á Akureyri eða í Nonnahúsi, æskuheimili rithöfundarins Jóns Sveinssonar.
Jólahúsið í Eyjafjarðarsveit er svo skemmtilegur viðkomustaður fyrir þau sem vilja komast í smá jólastemningu í haustfríinu og skoða jólaskraut og góðgæti. Hér má skoða söfn á Norðurlandi

Í Mývatnssveit verður vetri fagnað með Slægjufundi í Skjólbrekku laugardaginn 24. október kl. 14. Þar verður dagskrá fyrir unga sem aldna og sameiginlegt kaffiborð sem gestir leggja til veitingar á. Húsið opnar kl. 13 með kökubasar á vegum blakdeildar Mývetnings.

Á Norðurlandi vestra stendur barnamenningarhátíðin Skúnaskrall yfir dagana 21. október–4. nóvember. Þar er fjölbreytt dagskrá fyrir börn og ungmenni, meðal annars dansnámskeið, tröllabrúðusmiðjur, myndlist og ratleikir. Á skunaskrall.is má skoða dagskrá eftir stöðum og finna upplýsingar um skráningu.

Góða skemmtun í haustfríinu!