Rannsaka sögutengda ferðaþjónustu
Markaðsstofa Norðurlands hefur gert samkomulag við Rannsóknarmiðstöð ferðamála (RMF) og Rannsóknir og ráðgjöf ferðaþjónustunnar (RRF) um rannsóknir á sögutengdri ferðaþjónustu.
RMF mun greina ferðavenjur og viðhorf ferðamanna sem sækja söfn og setur á Norðurlandi, með það að markmiði að öðlast skilning á því hvernig saga landshlutans virkar sem aðdráttarafl fyrir ferðamenn. Með því fæst góð innsýn í það hvers vegna ferðamenn heimsækja ákveðna staði, hver upplifun þeirra er og hvað almennt einkennir þennan markhóp.
RRF mun vinna úr Dear Visitors könnuninni, en henni hefur verið beint að erlendum ferðamönnum sem fara um Flugstöð Leifs Eiríkssonar allt frá árinu 1996. Þar verður kannað hvort ferðamenn hafi aflað sér upplýsinga um Ísland í gegnum Íslendingasögur, hafi heimsótt safn eða sýningu, farið á sögufræga staði og fleira í þeim dúr. Auk þess verður greint hvort saga og menningararftur eða menning og listir hafi haft veruleg áhrif á ákvörðun um að heimsækja Ísland og einnig Norðurland sérstaklega.
Niðurstöður rannsóknanna verða kynntar á haustmánuðum. Verkefnið er stutt af Atvinnuvega- og nýsköpunarráðuneytinu í gegnum Ferðamálastofu,
Nánari upplýsingar um verkefnið veitir Björn H. Reynisson hjá Markaðsstofu Norðurlands, bjorn@nordurland.is